ఇంజనీర్ల అవతారమెత్తి కాళేశ్వరాన్ని ముంచేశారు.. కేటీఆర్ టూర్‌పై మంత్రి శ్రీధర్ బాబు నిప్పులు!

​​మేడిగడ్డలో నీటి నిల్వ సాధ్యం కాదని తెలిసి కూడా రైతులను రెచ్చగొడుతున్నారు; కేంద్ర బృందం (NDSA) రిపోర్ట్ ప్రకారమే చర్యలు; బీఆర్ఎస్ పాపాలకు ప్రాయశ్చిత్తం లేదంటూ కాంగ్రెస్ మంత్రి ఘాటు వ్యాఖ్యలు.

భూపాలపల్లి, జూలై 5(న్యూస్ లైట్) : గత బీఆర్ఎస్ ప్రభుత్వ వైఫల్యాలు, డిజైన్ లోపాల వల్లే కాళేశ్వరం ప్రాజెక్టులోని బ్యారేజీలు కుంగిపోయాయని ఐటీ, పరిశ్రమల శాఖ మంత్రి దుద్దిళ్ల శ్రీధర్ బాబు తీవ్రస్థాయిలో ధ్వజమెత్తారు. శనివారం బీఆర్ఎస్ వర్కింగ్ ప్రెసిడెంట్ కేటీఆర్ బృందం కన్నెపల్లి, మేడిగడ్డ పర్యటనకు వెళ్లిన నేపథ్యంలో మంత్రి శ్రీధర్ బాబు కాంగ్రెస్ నేతలతో కలిసి మీడియా సమావేశంలో మాట్లాడారు. బీఆర్ఎస్ నాయకులు టెక్నికల్ పరిజ్ఞానం లేకుండా ఇంజనీర్ల అవతారమెత్తి తెలంగాణ సొమ్మును గోదావరి పాలు చేశారని మండిపడ్డారు.

​పొరపాట్లు బీఆర్ఎస్ వి.. నిందలు మాపై నా?

కేవలం రెండు పిల్లర్లు మాత్రమే కుంగిపోయాయని, మిగతా బ్యారేజ్ అంతా బాగుందని కేటీఆర్ మాట్లాడటం ఆయన అజ్ఞానానికి నిదర్శనమని మంత్రి విమర్శించారు. నేషనల్ డ్యామ్ సేఫ్టీ అథారిటీ (NDSA) ఇచ్చిన నివేదిక ప్రకారం మేడిగడ్డ బ్యారేజ్ బ్లాక్ నెంబర్ 7 పూర్తిగా దెబ్బతిన్నదని, అక్కడ పైపింగ్ లోపాల వల్ల తీవ్ర ముప్పు పొంచి ఉందని స్పష్టం చేశారు. బ్యారేజీలలో నీటిని నిల్వ ఉంచితే ఒత్తిడి పెరిగి మొత్తం ప్రాజెక్టు కొట్టుకుపోయే ప్రమాదం ఉందని కేంద్ర నిపుణుల బృందం హెచ్చరించిందని, అందుకే గేట్లు తెరిచి ఉంచాల్సి వస్తోందని ఆయన వివరించారు.

​రాజకీయాల కోసం రైతులను రెచ్చగొడుతున్నారు:

పది సంవత్సరాలు మంత్రిగా ఉన్న కేటీఆర్‌కు 'పాండ్ లెవెల్' (Pond Level) మెయింటైన్ చేయకుండా నీటిని ఎత్తిపోయడం సాధ్యం కాదనే కనీస జ్ఞానం లేదా అని శ్రీధర్ బాబు ప్రశ్నించారు. కేవలం రాజకీయం కోసమే, రైతుల మనస్సుల్లో విషం నింపడానికే బీఆర్ఎస్ నేతలు పర్యటనలు చేస్తూ అబద్ధాలు ప్రచారం చేస్తున్నారని ఆరోపించారు. గతంలో కన్నెపల్లి పంప్‌హౌస్ మునిగిపోయినప్పుడు నాడు ప్రతిపక్షంలో ఉన్న తాము పర్యటించకుండా ఇదే పోలీస్ స్టేషన్‌లో అరెస్ట్ చేయించారని, కానీ నేడు తాము బీఆర్ఎస్ నేతలను అడ్డుకోకుండా వాస్తవాలు చూడటానికే పంపించామని గుర్తుచేశారు.

​యుద్ధప్రాతిపదికన రిపేర్లు:

రైతు సంక్షేమమే ధ్యేయంగా రేవంత్ రెడ్డి ప్రభుత్వం పనిచేస్తోందని మంత్రి తెలిపారు. NDSA నిపుణుల సూచనల మేరకు జియో-టెక్నికల్ పరీక్షలు, రాడార్ సర్వేలు, బోర్లు వేసి నాణ్యతను పరిశీలిస్తున్నామని, నివేదిక రాగానే వీలైనంత త్వరగా మరమ్మతులు పూర్తి చేసి ప్రాజెక్టును అందుబాటులోకి తెస్తామని హామీ ఇచ్చారు. ఇప్పటికే తాము అధికారంలోకి వచ్చిన కొద్ది రోజుల్లోనే రైతు భరోసా, రుణమాఫీ వంటి పథకాలతో రైతులను ఆదుకుంటున్నామని స్పష్టం చేశారు. తెలంగాణ రైతులకు బీఆర్ఎస్ నేతలు బేషరతుగా క్షమాపణ చెప్పాలని మంత్రి శ్రీధర్ బాబు డిమాండ్ చేశారు.