#PANCardNewRules 2026 : పాన్ కార్డ్ దరఖాస్తు నిబంధనల్లో భారీ మార్పులు: ఏప్రిల్ 1 నుంచి కొత్త రూల్స్

◆ ​మార్చి 31 వరకు మాత్రమే కేవలం ఆధార్‌తో పాన్ పొందే అవకాశం

​ఆదాయపు పన్ను శాఖ పాన్ (PAN) కార్డ్ దరఖాస్తు నిబంధనలలో కీలక మార్పులు తీసుకురానుంది. కేంద్ర ప్రభుత్వం డిజిటల్ ఇండియాలో భాగంగా తీసుకువస్తున్న ఈ కొత్త నిబంధనలు ఏప్రిల్ 1, 2026 నుండి దేశవ్యాప్తంగా అమలులోకి రానున్నాయి. కొత్తగా పాన్ కార్డు తీసుకోవాలనుకునే వారు ఈ మార్పులను తప్పక గమనించాలి.

​మార్చి 31 వరకు కేవలం ఆధార్‌తోనే..

ప్రస్తుతం కేవలం ఆధార్ కార్డును ఉపయోగించి పాన్ కార్డుకు సులభంగా దరఖాస్తు చేసుకునే సదుపాయం ఉంది. అయితే, ఈ అవకాశం మార్చి 31, 2026తో ముగియనుంది. పాన్ కార్డు లేని వారు ఈ గడువు లోపు దరఖాస్తు చేసుకుంటే ఆధార్ తప్ప ఎలాంటి అదనపు పత్రాలు అవసరం లేదు.

​ఏప్రిల్ 1 నుంచి అమలులోకి వచ్చే ప్రధాన నిబంధనలు ఇవే:

• ​పుట్టిన తేదీ (DOB) ధృవీకరణ తప్పనిసరి: ఏప్రిల్ 1వ తేదీ నుండి పాన్ కార్డు కోసం దరఖాస్తు చేసుకునే వారు కేవలం ఆధార్ ఇస్తే సరిపోదు. ఆధార్ కార్డుతో పాటు అదనంగా పుట్టిన తేదీని (Date of Birth) ధృవీకరించే మరో పత్రాన్ని కచ్చితంగా సమర్పించాల్సి ఉంటుంది.
• ​పాత ఫారాలు రద్దు: పాత పాన్ దరఖాస్తు ఫారాలు ఏప్రిల్ 1, 2026 నుండి స్వీకరించబడవు. దీనికోసం త్వరలో కొత్త దరఖాస్తు ఫారాలను అందుబాటులోకి తీసుకురానున్నారు.
• ​కార్డుపై పేరులో మార్పులు: పాన్ కార్డుపై పేరు ముద్రించే విధానంలో కీలక మార్పు జరిగింది. ఏప్రిల్ 1 నుంచి దరఖాస్తు ఫారంలో 'నేమ్ ఆన్ కార్డ్' (Name on Card) ఆప్షన్ తొలగించబడుతుంది. అంటే, మీ ఆధార్ కార్డులో పేరు ఏ విధంగా అయితే ఉంటుందో, పాన్ కార్డుపై కూడా అదే పేరు యథావిధిగా ముద్రించబడుతుంది. పేర్లలో ఎలాంటి మార్పులు చేసుకోవడానికి వీలుండదు.

​పుట్టిన తేదీ (DOB) ప్రూఫ్‌గా అనుమతించే పత్రాలు (ఏప్రిల్ 1 నుంచి):

కొత్త నిబంధనల ప్రకారం పుట్టిన తేదీని ధృవీకరించడానికి కింది పత్రాలలో ఏదైనా ఒకదాన్ని సమర్పించవచ్చు:

• ​జనన ధృవీకరణ పత్రం (Birth Certificate)
• ​ఓటర్ ఐడీ కార్డ్ (Voter Card)
• ​టెన్త్ క్లాస్ లేదా మెట్రిక్యులేషన్ సర్టిఫికెట్
• ​డ్రైవింగ్ లైసెన్స్
• ​పాస్‌పోర్ట్
• ​మ్యాజిస్ట్రేట్ జారీ చేసిన అఫిడవిట్
• ​ఇతర ప్రభుత్వ గుర్తింపు పత్రాలు

​ఇంకా పాన్ కార్డు తీసుకోని వారు అదనపు పత్రాల అవసరం లేకుండా ప్రక్రియను పూర్తి చేయాలనుకుంటే, మార్చి 31, 2026 లోపు వెంటనే దరఖాస్తు చేసుకోవడం ఉత్తమం.